|
|
S chas gäh, das uf em Weg is Dorf ich irgendöppis spinntisiere,
und s nöd ganz klar isch, folgt de Hund jetzt mir oder lauf ich ihm hinenoh.
Öppenöpper stutzt, well ich ganz weltfremd ohni Gruess verbiimarschiere.
S chas gäh, wie gseit, dass ich denn eifach plötzli vor em Trube usse stoh.
I gange d Stäge uf und lohne d Hektitk eifach dusse vor de Türe.
S isch wien e andri Welt, wo mich do inne jetze plötzli still umfangt.
E Welt us Gschicht und Gschichte, s isch wien es Stückli Heimat, won i gspüre,
ganz eifach will i gseh, dass no min Tschoope a de Garderobe hangt.
Me kennt mi do im Trube, und d Begrüessig isch scho fascht echli vertraulich.
I sueche mir en Platz und hocke ab a eim vo dene hölzge Tisch.
Es isch zwor zimli gschäftig. Trotzdem wirkts uf mich beschaulich.
Und jede, schiint mer, hät chli s Gfühl, dass er do inne öppis Bsunders isch.
Am hindre Tisch im Egge tönts ganz lebhaft. Es wird offesichtlich gjasset.
Dänäbe trinked zwei, is Gspröch vertüüft, en Schoppe Bürgerwii.
Am Tisch vom Damechränzli gohts recht luschtig zue. S wird glachet und wird gspasset.
Und irgend en Exot verzellt vom Urknall und de Chaostheorie.
Es schmöckt verlockend guet, und i ghör, wies i de Chuchi us hantiered.
De Hund lueget mi a und hofft, es gäb für ihn es Häppli undrem Tisch.
Es isch, als wett er säge: Hör doch uf, dich eso blöd welle go ziere,
Was gits denn schöners, als wenn me sich ohni Wort so völlig einig isch!
I weiss, s wär langsam Ziit zum Goh. Doch um mis Herz wird's warm und wärmer.
I fühl mi wohl do inne, segs eleige oder segis z zweit.
Was wäri, wenns kein Trube gäbt? Es dunkt mi, üses Dorf wär ärmer.
S isch schön, dass es so Beize git, und hebed Dank für eui Gastlichkeit.
|
